10-декабрь – Эл аралык адам укугу күнүнө арналган жумалык акция Кыргыз–Өзбек Эл аралык университетинде старт алды. Иш-чара Юридика-экономика факультетинин “Мамлекеттик-укуктук сабактар” кафедрасы тарабынан уюштурулууда.

Акциянын ачылышында университеттин ректору, профессор Абдилбает Мамасыдыков сөз сүйлөп, адам укуктары ар бир адамдын жашоосундагы эң баалуу байлык экенин белгиледи. Ал студенттерге кайрылып, жакшы билим алып, мыкты юрист болуп чыгуу үчүн укугуңду гана эмес, милдетиңди да билүү маанилүү экенин эске салды.

Факультеттин деканы, юридика илимдеринин доктору, профессор Алмагүл Көкөева да куттуктоо сөзүн айтып, мыйзамдуулукту бекемдөө жана коррупцияга каршы күрөш татыктуу билимден башталарын белгиледи.

Эскерте кетсек, жумалыктын алкагында акысыз юридикалык кеңеш берүү, мыйзам таануу боюнча сынактар, акыл таймаштар жана “Өз укугуңду бил!” аталышындагы иш-чаралар өтөт.

Жумалыктын ачылыш аземи ректордун катышуусундагы “Кол үзүмдөрү” аталышындагы оюн менен улантылып, суроолорго туура жооп берген катышуучуларга факультет тарабынан белектер тапшырылды.

Ошондой эле социалдык иштер жана мамлекеттик тил боюнча проректор Сыргак Сарыков башында турган жетекчилер жана окутуучулар да активдүү катышышып, адам укуктарына байланыштуу суроолорго жооп берип, белектер менен сыйланды.